ٹرمپ کی خوشنودی کے لیے قومی وقار کی قربانی کسی صورت قبول نہیں، حافظ نعیم الرحمن

امیرجماعت اسلامی پاکستان حافظ نعیم الرحمن نے کہا ہے کہ ٹرمپ کی خوشنودی کے حصول کی فضول خواہش پر فلسطین سے متعلق قومی پالیسی کی قربانی کسی صورت قبول نہیں کی جائے گی۔ وزیراعظم کی نام نہاد امن بورڈ اجلاس میں شرکت اور فوج کو غزہ بھیجنے کا فیصلہ قوم کے وقار کے منافی ہے۔ حکمران غیر مقبول بھی ہیں اور نااہل بھی ہیں ۔ فارم سنتالیس کی حکومت کے یکطرفہ فیصلوں، آئی پی پیز معاہدوں کے خلاف اور موثر بلدیاتی نظام کے حق میں عید کے بعد بھرپور احتجاجی تحریک چلے گا۔
منصورہ میں پریس کانفرنس سے خطاب کے دوران امیر جماعت اسلامی نے پنجاب میں غربت کی شرح میں اضافہ ، کسانوں کی حالت زار ، سکولوں کی فروخت اور گورننس کے بحران کے باوجود وزیراعلیٰ مریم نواز کے گیارہ ارب کے پرتعیش طیارہ خریدنے کو شدید تنقید کا نشانہ بنایا اور کہا کہ مسائل کے باوجود حکمران خاندانوں کی عیاشیوں میں کوئی فرق نہیں پڑ رہا، پورے نظام سے ہی جان چھڑانا ہوگی۔ ڈپٹی سیکرٹری جنرل شیخ عثمان فاروق اور سیکرٹری اطلاعات شکیل احمد ترابی بھی اس موقع پر موجود تھے۔
امیر جماعت اسلامی کا کہنا تھا کہ مقتدرہ نے نااہل حکمران خاندانوں کو قوم پر مسلط کیا ہے، معیشت تباہ حال ہے ، گزشتہ چھ برس میں غربت کی شرح میں اضافہ ہوا ہے، اس وقت ملک میں مجموعی لحاظ سے غربت کی شرح اکتیس فیصد جب کہ پنجاب میں بیالیس فیصد تک ہے ، پنشن میں کٹوتی کے خلاف پنجاب کے سرکاری ملازمین احتجاج کررہے ہیں، صوبہ کا کسان پریشان ہے، گیارہ ہزار سرکاری سکولوں کی نج کاری کردی گئی، صوبہ میں ایک کروڑ بچے سکولوں سے باہر ہیں ، انتالیس سو روپے فی من امدادی قیمت کے اعلان کے باوجود پنجاب میں کسانوں سے گندم نہیں خریدی گئی، چھوٹا کسان موجودہ گندم کی فصل کے بارے میں پریشان ہے، وزیراعلیٰ ان گھمبیر مسائل کے باوجود کارکردگی کے اشتہارات دے رہی ہیں، انہوں نے ذاتی استعمال کے لیے اربوں کا جہاز خرید لیا۔ حافظ نعیم الرحمن نے کہا کہ بلوچستان اور خیبر پختونخواہ میں بے چینی اور بدامنی ہے ، عوام اور سیکیورٹی اداروں میں خلیج بڑھ رہی ہے، چاروں صوبوں کی حکومتوں کے درمیان میں بری کارکردگی کا مقابلہ جاری ہے۔ قومی معیشت مسلسل بحران کی زد میں ہے ، آئی پی پیز سے معاہدوں کے باوجود بجلی کی قیمت میں کمی نہیں ہوئی، حکومت نے شمسی توانائی پر وضح پالیسی سے انحراف کرتے ہوئے نیٹ میٹرنگ کی قیمتوں میں مزید کمی کا اعلان کردیا ہے جس سے تاجر سمیت ہر طبقہ پریشان ہے، پنجاب سمیت چاروں صوبوں میں بلدیاتی نظام غیر موثر ہے ۔ رمضان کے بعد عوامی بیداری کی بھرپور تحریک چلے گی ، قوم حق کے لیے بھرپور آواز اٹھائے۔